CRÓNICA RÍAS BAIXAS e Abertos de Billarda en Nadal

0
101

       A xornada de Beluso elevou ao máis alto do podio a Ricar, quen está acelerando o paso para seguir tendo posibilidades de título. Juanma mantén o primeiro posto, aínda que vé aproximarse aos pesos pesados da Conferencia. Ricar fixo 20, 26 e 27 ptos nas 3 últimas xornadas o que lle supuxo subir ata a terceira praza e acercarse ao líder indiscutible Juanma. Xunto con el, os únicos que nestas 3 xornadas últimas estiveron na vintena de ptos ou máis son Xan e Luís Camiña. O de Lúa de Forza continúa moi de vagar acercándose ao primeiro posto e o de Marín xa se sitúa quinto. Fantástica xornada para Salva, Outeiro, Vari, Ricardo Lois, Daniel, Che e Manu. Todos estes palanadores chegaron á vintena de ptos.

      Na Categoría Feminina, houbo moita igualdade nas puntuacións das xogadoras que ocupan as primeiras posicións na xeral. Deste xeito, Lu ganou a xornada con dous ptos de vantaxe sobre Bego e Adriana. A agradable sorpresa foi a magnífica actuación de María Golo, quen xogaba na casa e notouse. Pasou de grupo sendo terceira e só a súa inexperiencia nos enfrontamentos de cruce eliminatorio puido derrotala. Belmira, María Martínez e Marga Puente foron as outras palanadoras que chegaron á decena de ptos. 
         
        O equipo local, Corredoiras, fíxose co triunfo na xornada, pero só superou por 7 ptos a Lúa de Forza. O equipo de Bueu agradeceu a reaparición de Outeiro e botou en falta os ptos de Fari. Lúa de Forza contou coa gran actuación de Lu e Chicho para manter a distancia co líder nunhas cifras moderadamente optimistas. Gharaboto sustituíu a falta de ptos do seu xogador franquicia, Piru, coa destacada achega de ptos por parte de Vari e a consistencia de Luís Camiña. O equipo de Marín foi terceiro con 75 fenomenais ptos. Rinoceronte e Armadiña conseguiron 58 ptos. Os Rinos Che e Daniel esforzáronse ao máximo para diminuír o impacto negativo da falta de asistencia de Cris. Así, coa inestimable colaboración de Alberte e José Manuel, lograron 58 puntazos co número mínimo de xogadores. Manu xa se converte no xogador franquicia de Armadiña? Despois de subir por segunda vez ao podio nesta temporada, podemos dicir que o equipo de Poio ten en Maquieira a un relevo natural de Cho, para cando o de Combarro naufrague noutro pavillón. Valpaços Terra Quente tivo unha moi boa actuación con 55 ptos, pois non se podía esperar que tivesen outra xornada como a anterior en Vigo, dado que lle faltaron xogador@s de moito nivel, como Tania e Salgue. Laxe de Rons notou as ausencias de Gerardo Torres e Chichí, mais así e todo conseguiron 43.  
       A Categoría de Equipos Femininos tivo de novo a loita entre os dous grandes equipos da competición. Desta vez, foi Valpaços que ganou, pero só con dous ptos máis ca Gharaboto. Terceiro foi Corredoiras e cuarto Lúa de Forza. Valpaços contou con 4 xogadoras e todas puntuaron. A xogadora franquicia Adriana lidera un grupo de mulleres fabulosas que cando falta Tania móstranse moi firmes no seu empeño por puntuar. Non nos cansamos de destacar a actuación de Carmen Pazos, quen con 84 anos conseguiu 5 ptos para o equipo. Gharaboto, con máis músculo competitivo, presentou a 10 xogadoras. Esta temporada pensamos que o equipo de Marín formou un equipo feminino con potencial para disputar o Título que o ano pasado tiveron moi lonxe. Corredoiras formou un equipo de futuro coas incorporacións de Yudani e María Golo. Bego e elas dúas deben manterse para que cando regrese Chefa poidan asegurar a terceira praza do podio. Armadiña está notando os poucos ptos de Elena Sabarís nas últimas xornadas, pero, por outra beira, encontrámonos cunha renacida Laura, que despois do seu embarazo volveu transformada e o que antes era soamente o pto de participación convertiuse en 13 e 6 ptos nas dúas últimas xornadas. Outras xogadoras de Armadiña están pensando se pedir aos reis magos un embarazo.
  Agora quedan deste xeito as clasificacións nas primeiras posicións

     Para confirmar que algo cambiou no rendemento dos equipos e que se produciron varios “sorpassos”, nada mellor que mirar a clasificación do ano pasado nesta mesma xornada. Corredoiras fixo esta temporada 14 ptos menos, Lúa de Forza 69 ptos máis, Gharaboto 11 ptos máis, Armadiña 85 ptos máis, Rinoceronte 11 ptos menos, Valpaços 56 ptos máis e Laxe de Rons 8 ptos menos. En resume, o equipo que máis mellorou é Armadiña e o equipo que máis ptos perdeu en relación á temporada pasada é Corredoiras. 
       Deste xeito, en canto a posicións, a única que non sufríu alteración foi a de líder, que continúa en poder de Corredoiras. Lúa de Forza superou a Gharaboto no segundo posto, Armadiña a Rinoceronte na cuarta posición e Valpaços a Laxe de Rons na sexta, sempre comparando coa temporada pasada por esta época. 
      
       En Equipos Femininos, recuperou a primeira posición o equipo de Vigo, aínda que empatado a ptos con Gharaboto. Preciosa disputa a que teremos esta temporada ata o final, pois Gharaboto subiu de nivel coa incorporación de María Martínez e Valpaços bota en falta os ptos de Tania. Será quen o talento de Adriana de guiar ás súas compañeiras ao triunfo final ou o cadro de xogadoras máis numeroso da franquicia de Marín acabará impoñendo o seu dominio? Veremos e gozaremos con cada golpe. 

SAÚDE e Billarda!                               AMOR e Billarda!


para o 2019!





    Antes de finalizar o ano 2018, aínda quedan tres Abertos de referencia. Un na área da Conferencia Rías Baixas, o Aberto da Mestría de Billarda 2018 (Pontevedra. Antigo Master que mudou de denominación), outro na área da Conferencia Norleste, o Aberto Xosé da Flor (Meira), en homenaxe ao que foi compañeiro de xogo durante moitos anos, e outro na Conferencia Noroeste: o Aberto de Fin de Ano (Paiosaco). Para todas aquelas e todos aqueles a quen tanta festa sen xogar á billarda se lle fai costa arriba tendes estas tres citas no calendario de Nadal.





Deixar resposta

Please enter your comment!
Pon aquí o teu nome