PREVIA última xornada LNB NOROESTE Ponteceso 12 maio

0
104
     Última xornada na LNB NOROESTE. Arredor do MELGA haberá que encontrar os últimos ptos da temporada. Algúns deses puntos serán decisivos para resolver varias das incógnitas que están sen aclarar. 
       O Título da Categoría Infantil está entre dous monstros da billarda, Abel e Miguel. Non vos perdades o desenlace deste duelo baixo o sol. Temperaturas previstas para o domingo 12 maio entre 20 e 25 graos, cousa á que non están habituados os dous xogadores que proveñen das frías terras da Laracha, polo tanto, veremos que técnica de golpeo se adapta mellor, a “posición araña” de Miguel ou a posición “Ponte elevado” de Abel. Por outra beira, aínda que Miguel teña 3 ptos máis que Abel, este ten unha porcentaxe de ptos por xornada mellor que o de Soandres, xa que, o palanadorguitarrista de Paiosaco faltou a cinco xornadas. Miguel fai 11 ptos de media por xornada e Abel 15 ptos por xornada, daquela a cousa vai estar moi apretada ata a última carreira. Ademais, hai que ter en conta que Miguel progresou de xeito brillante no seu xogo. 
     Outra pugna interesante, e que igual precisa dun desempate final a tres, é unha praza de finalista LNB VARADOS 2019. Están empatados Roi, Kevin e Edu. Considerando que o campo de Ponteceso non é propicio a que se fagan varados, pois, igual ao finalizar a xornada as cousas quedan como estaban. Polo tanto, habería que proceder a un desempate espectacular entre tres maneiras diferentes de golpear a billarda. Mentres, o home araña de Paisaco usa a potencia da rotación dun tronco traballado en longas sesións de pesas e abdominais, o fino bailarín de Kevin utiliza o movemento xiratorio de pés con compás 6/8 que lle permite rapidez e vivacidade no golpe. Roi pertence a unha tradición artilleira de moitos séculos, entón o seu golpe é coma un disparo de canón. Cal destes complexos e precisos sistemas de golpeo de billarda acadará o varado en Ponteceso? Se queredes vivilo en directo, domingo 12 maio, 10:30 h., arredores do MELGA.
      
      Outra posición que haberá que decidir en Ponteceso é a terceira posición do Podio Final da Conferencia. Edu avantaxa a Lito en 8 ptos, distancia que pode ser suficiente… ou non. Edu ten dous frontes abertos, esta posición de honra que quedará na estatística da LNB e a praza de finalista na Categoría de Varados. Tamén, deberá atender a gravar as imaxes das xogadas máis espectaculares. Isto significa que gastará moita enerxía e non sabemos se a deshidratación lle provocará a consecuente redución de forza. 
             
       Finalmente, e non por iso menos importante, para que Cotelo acade a última praza de finalista que ocupa Lois Fontán, Santa Marta, ou algún familiar, tería que realizar un milagre ou algo semellante… a proeza de que Cotelo faga 19 ptos. Proeza que habería que complementala cunha desafortunada indisposición de L. Fontán que lle impedise puntuar en ningunha das 5 carreiras. Case todo é posible na billarda, entón, haberá que estar presentes para presenciar o milagre ou a realidade.
     Certo que na Categoría de Equipos MAC aínda ten posibilidades matemáticas de alcanzar a APB, pero, unha xogada mestra (hai quen usa outro adxectivo, raposeira) do equipo larachino fixo que a xornada comece ás 10.30h., horario incompatible co bo rendemento de varios xogadores de Cerceda que forman parte do equipo MAC. Ou sexa, non cremos que APB teña dificultades para manter a segunda praza de finalista LNB. 
    Certo, tamén, que en varados, amais dos tres mencionados xogadores empatados a 4 varados, hai outros con 3 varados, Óscar, Berdillo e Iván, que poderían ter posibilidades de acceder a esa última praza, mais a historia dinos que no campo híbrido de Ponteceso é moi improbable que se fagan varados. Por iso, formulamos a hipótese dun evidente desempate final entre Edu, Roi e Kevin.
    

Deixar resposta

Please enter your comment!
Pon aquí o teu nome